Siollabas Nua Gaeilge don Tríú Bliain Ollscoile Seolta i gColáiste Phádraig

 

Sheol Neasa Ní Chinnéide, saineolaí ar an ilteangachas agus iar-Chathaoirleach an Bhiúró Eorpaigh do Theangacha Neamhfhorleathana, an tríú céim de thionscadal náisiúnta siollabais don Ghaeilge ar an tríú leibhéal anseo i gColáiste Phádraig, tráthnóna Dé Luain, 6 Feabhra.

An Mheitheal um Theagasc na Gaeilge ar an Tríú Leibhéal, grúpa atá comhdhéanta d’ionadaithe ó na Ranna Gaeilge in ollscoileanna, i gcoláistí oideachais agus in institiúidí eile tríú leibhéal thuaidh agus theas, atá i mbun an tionscadail seo, le tacaíocht ó Fhoras na Gaeilge. Tá fiche coláiste ar fad rannpháirteach sa Mheitheal, a bunaíodh sa bhliain 2008, agus tá an tOll. Máirín Nic Eoin ó Roinn na Gaeilge, Coláiste Phádraig, Droim Conrach agus an Dr John Walsh ó Roinn na Gaeilge, Ollscoil na hÉireann, Gaillimh, ina gComhstiúrthóirí ar an tionscadal. Ba í Ailín Ní Chonchúir, a bhí fostaithe mar Bhainisteoir Tionsadail, a dhear agus a scríobh an Siollabas agus a chruthaigh an t-ábhar samplach teagaisc a ghabhann leis.     

Agus Siollabas Nua an Tríú Bliain á sheoladh ag Neasa Ní Chinnéide, mhol sí obair na Meithle go hard, ag díriú go háirithe ar an earraíocht a baineadh as an bhFráma  Tagartha Eorpach, agus an tsamhlaíocht agus an chruthaitheacht a bhain leis an ábhar teagaisc ilmheáin a ghabhann leis an Siollabas. Ghabh an Bainisteoir Tionscadail, Ailín Ní Chonchúir, buíochas le gach uile dhuine a bhí rannpháirteach san obair, go háirithe an Mheitheal Siollabais, grúpa lárnach saineolaithe teanga agus teangeolaíochta. In aitheasc a thug an tUas. Seán Ó Cuinn, Leasphríomhfheidhmeannach Fhoras na Gaeilge, luaigh sé an tábhacht ar leith a bhain le gné an chomhoibrithe idir-institiúidigh den tionscadal. Agus clabhsúr á chur aige leis an ócáid fhoirmiúil, mhaígh an Dr John Walsh go bhfuil sé i gceist struchtúr na Meithle a choinneáil mar ghréasán náisiúnta ardoideachais chun tionscnaimh eile teagaisc agus taighde a fhorbairt san am atá amach romhainn. 

Is go leictreonach atá an Siollabas foilsithe, agus tá sé ar fáil ar shuíomh gréasáin an Tionscadail, www.teagascnagaeilge.ie, suíomh atá á riaradh ag an Dr Caoimhín Ó Dónaill in Ollscoil Uladh. Tá teacht ar an suíomh ar an Siollabas féin; ar ábhar samplach a léiríonn prionsabail an tSiollabais agus conas na prionsabail sin a chur i bhfeidhm sa seomra ranga; ar an bhfillteán foghlama do mhic léinn atá mar chuid lárnach den Siollabas; ar liosta acmhainní tacaíochta don mhac léinn; agus ar chuntas ar chúlra agus ar stair an Tionscadail a bhfuil an Siollabas mar thoradh air.

 

 

Last Updated: Wednesday February 08 2012